Vdes gazetari serb Stefan Cvetkoviq, që kishte denoncuar kërcënime ndaj vëllezërve Vuçiq

Prishtinë, 13 korrik 2026 06:57

Gazetari serb Stefan Cvetkoviq, ka ndërruar jetë të dielën në Akademinë Mjekësore Ushtarake (VMA) në Beograd, ku po trajtohej për shkak të përkeqësimit të gjendjes shëndetësore, ndërsa u bë i njohur në opinionin publik në vitin 2018, kur u raportua zhdukja e tij në Bela Crkva. Automjeti i tij ishte gjetur me dyert e hapura dhe dritat e ndezura, ndërsa ai u lokalizua rreth 30 orë më vonë pas një operacioni kërkimi nga policia.

Cvetkoviq kishte raportuar publikisht për një numër të madh kërcënimesh me vdekje ndaj tij dhe familjes së tij në vitin 2015.

Sipas tij, kërcënimet nisën pasi i bëri një pyetje kryeministrit të atëhershëm të Serbisë, Aleksandar Vuçiq, gjatë një konference për shtyp në Qeverinë serbe më 7 gusht, lidhur me hetimet për abuzimet në Fondin e Investimeve Kapitale të Vojvodinës.

“Po atë pasdite, mora për herë të parë ‘sugjerime miqësore’ anonime që të mos ‘ngacmoja’ për këtë, se mund të futesha në telashe për këtë. Më vonë, filluan kërcënime të vazhdueshme nëpërmjet internetit dhe telefonit. Ata kërcënuan se do të më masakronin, do të më vrisnin, do të më thyenin shtyllën kurrizore, do të më vrisnin fëmijën, do të më prisnin gjuhën, do të më thyenin gishtat”, kishte deklaruar ai.

Ai u bë i njohur edhe për raportimet dhe hetimet e tij mbi vrasjen e politikanit serb të Kosovës, Oliver Ivanoviq

Lajmi për vdekjen e tij konfirmua nga Drejtoria për Ekzekutimin e Sanksioneve Penale e Serbisë, e cila bëri të ditur se Cvetkoviq ishte duke vuajtur një dënim me burg dhe ishte transferuar në VMA më 24 qershor, pasi më parë kishte marrë trajtim në Spitalin Special të Burgut në Beograd.

“Personi i dënuar Stefan Cvetkoviq ndërroi jetë këtë mëngjes në Akademinë Mjekësore Ushtarake. Të dhënat mbi trajtimin e tij dhe kartelën mjekësore nuk mund të bëhen publike, pasi mbrohen nga Ligji për Mbrojtjen e të Dhënave Personale dhe ligjet që rregullojnë të drejtat e pacientëve”, thuhet në përgjigjen e Drejtorisë për portalin Nova.

Autoritetet serbe njoftuan se, në përputhje me procedurat ligjore, për rastin janë informuar policia, prokuroria dhe familja e të ndjerit.