Arrihet marrëveshja tregtare mes BE-së dhe SHBA-së

Edinburg, 28 Korrik 2025

Presidenti i SHBA-së, Donald Trump, dhe presidentja e Komisionit Evropian, Ursula von der Leyen, kanë arritur një marrëveshje të rëndësishme tregtare mes Shteteve të Bashkuara dhe Bashkimit Evropian, pas takimeve intensive të zhvilluara në Skoci.

Gjatë një konference për shtyp, Trump bëri të ditur detaje nga marrëveshja, duke theksuar angazhimin e BE-së për të blerë energji amerikane në vlerën e 750 miliardë dollarëve, si dhe për të investuar në SHBA 600 miliardë dollarë shtesë krahasuar me nivelet aktuale të investimeve.

“Bashkimi Evropian do të bjerë dakord të blejë nga Shtetet e Bashkuara energji me vlerë 750 miliardë dollarë. Ata do të bien dakord të investojnë në Shtetet e Bashkuara 600 miliardë dollarë më shumë sesa po investojnë tashmë,” deklaroi Trump.

Takimet nisën të dielën, ndërsa një afat i vendosur për të premten ushtronte presion për arritjen e një marrëveshjeje, për t’i shmangur tarifat 30% që SHBA paralajmëroi për importet evropiane. Presidenti amerikan konfirmoi se nuk kishte hapësirë për të ulur tarifën gjithëpërfshirëse prej 15% për produktet nga BE, në mungesë të një marrëveshjeje të re.

Marrëveshja u finalizua pas paralajmërimeve të mëhershme nga Trump, se në mungesë të një ujdie deri më 9 korrik, Shtetet e Bashkuara do të aplikonin tarifa të reja që nisin nga 1 gushti, duke rritur normat nga 10% në 30% për shumicën e mallrave evropiane. Trump e justifikoi këtë me deficitin e lartë tregtar mes dy palëve.

Në deklaratën e saj përpara bisedimeve, Ursula von der Leyen e përshkroi Trump si “një negociator të ashpër”, ndërsa ky i fundit theksoi se detyrimet e reja tarifore do të zbatohen ndaj partnerëve që nuk kanë arritur marrëveshje me SHBA-në deri në fundjavë, përjashtuar tarifat ekzistuese mbi çelikun dhe aluminin.

Marrëveshja shihet si një hap i rëndësishëm drejt stabilizimit të marrëdhënieve tregtare mes dy ekonomive më të mëdha në botë, pas muajsh tensionesh dhe kërcënimesh tarifore reciproke.