Kosova në grup me Italinë dhe Gjeorgjinë në kualifikimet për Botërorin 2028 në futsall

Prishtinë, 19 qershor 2026 20:55

Kombëtarja e Kosovës në futsall ka mësuar kundërshtarët e saj në fazën Main Round të kualifikimeve evropiane për Kupën e Botës FIFA 2028, pas shortit të tërhequr nga UEFA.

“Dardanët” janë shortuar në Grupin 10, ku do të përballen me Italinë dhe Gjeorgjinë, në një garë që pritet të jetë mjaft sfiduese për përfaqësuesen kosovare.

Përfaqësuesja e Kosovës siguroi kualifikimin në këtë fazë pas paraqitjeve të mira në raundin paraprak, duke konfirmuar ngritjen e vazhdueshme të futsallit kosovar në skenën ndërkombëtare.

Sipas formatit të garës, 36 kombëtare janë ndarë në 12 grupe me nga tri skuadra. Fituesit e secilit grup, së bashku me katër kombëtaret më të mira të renditura në vendin e dytë, do të sigurojnë kualifikimin direkt në Elite Round. Ndërkohë, tetë ekipet e tjera që përfundojnë të dytat do të detyrohen të kalojnë përmes fazës së play-off-it për të vazhduar garën.

Ndeshjet e Main Round do të zhvillohen në periudhën nga tetori i vitit 2026 deri në mars të vitit 2027, ndërsa Kosova synon të vazhdojë rezultatet pozitive dhe të mbetet në garë për një vend në fazën e ardhshme të kualifikimeve për Botërorin e futsallit.