Qeveria e Kosovës dhe Komuna e Deçanit investojnë mbi 2.6 milionë euro për banim social

Deçan, 12 qershor 2026 12:36

Komuna e Deçanit ka publikuar listën e përfituesve të nën-projektit për renovimin dhe rindërtimin e shtëpive private për familjet e cenueshme, në kuadër të projektit “Banimi Social Adekuat”.

Sipas njoftimit të komunës, lista është hartuar pas shqyrtimit të aplikacioneve dhe vlerësimit të tyre në përputhje me kriteret e përcaktuara për këtë program.

Përfituesit e përzgjedhur do të mbështeten përmes investimeve që synojnë përmirësimin e kushteve të banimit dhe krijimin e një mjedisi më të sigurt e më të përshtatshëm për jetesë.

Projekti “Banimi Social Adekuat” financohet nga Ministria e Mjedisit, Planifikimit Hapësinor dhe Infrastrukturës dhe parashikon renovimin e shtëpive ekzistuese, rindërtimin e objekteve të dëmtuara, si dhe ndërtimin e njësive të reja të banimit për kategoritë në nevojë. Për Komunën e Deçanit, vlera e përgjithshme e projektit tejkalon 2.6 milionë euro.

Autoritetet komunale kanë bërë të ditur se publikimi i listës së përfituesve është pjesë e procesit të zbatimit të projektit, i cili synon të përmirësojë standardin e jetesës për familjet me gjendje të rënduar sociale dhe ekonomike.