Muslija: Kosova do të japë gjithçka për të arritur në Kupën e Botës

Prishtinë 13 Mars 2026 13:42

Mesfushori i Kombëtares së Kosovës, Florent Muslija, në një intervistë për “FIFA.com”, ka folur rreth ëndrrës së madhe të ‘Dardanëve’ për t’u kualifikuar në Kupën e Botës 2026.

Kosova do të përballet me Sllovakinë më 26 mars në ndeshjen gjysmëfinale të “play-off-it”. Në rast se Dardanët do të triumfojnë në Bratislavë, atëherë në finalen e madhe të play-off-it, do të përballen me fituesin e ndeshjes Turqi-Rumani, duel që do të luhet në ‘Fadil Vokrri’.

Muslija thotë se Kosova është vend i vogël, por me zemër të madhe. Ai thotë se skuadra dardane do të jep më të mirën për të arritur kualifikimin në Botërorin 2026 që do të mbahet në SHBA, Kanada dhe Meksikë.

“Ne jemi një vend i vogël, por kemi shumë zemër, pasion dhe cilësi në futboll”, ka thënë Muslija.

“Kemi treguar se mund të përballemi me ekipet e mëdha. Duam të kualifikohemi në Kupën e Botës dhe do të japim gjithçka për ta arritur këtë”, ka pohuar ai.

Mesfushori shtoi se skuadra është shumë e bashkuar dhe beson se Kosova ka shanse reale për të bërë histori, duke i dhënë një motiv shtesë ekipit për sfidat vendimtare që vijnë.