Gjykimi për krime lufte në Gjakovë – I akuzuari Dragan Ristiq mohon të ketë qenë i uniformuar në vitin 1999

Prishtinë, 06 mars 2026 22:20

Dragan Ristiq, i akuzuar për krime lufte në komunën e Gjakovës, ka dhënë versionin e tij lidhur me akuzat e Prokurorisë Speciale që rëndojnë ndaj tij.

Në seancën e së premtes (06.03.2026), ai ka paraqitur mbrojtjen e tij.

Ai tha se gjatë kohës së luftës nuk ka qenë i uniformuar me uniformë ushtarake si rezervist, ndërsa pohoi se kishte qenë i uniformuar në vitin 1992.

“Në vitin 1992 kam qenë me uniformë ushtarake dhe më nuk më kanë thirrur. Atëherë e kam dorëzuar uniformën me të gjitha në kazermën ushtarake… Jo gjatë luftës nuk kam qenë, para luftës po”, deklaroi i akuzuari.

Ristiq tha se më 20 qershor 1999, bashkë me familjen e tij dhe me qytetarë tjerë serbë, janë larguar nga qyteti i Gjakovës dhe kanë shkuar në Serbi.

Më tej, i akuzuari, lidhur me dëshminë e dëshmitarit Afrim Caka se ai ua kishte ndarë familjet dhe e kishte keqtrajtuar fizikisht vëllain e tij, tha se kjo nuk është e vërtetë.

“Ajo nuk është e vërtetë, të tjerë kanë qenë ata. Kjo është gabim”, tha i akuzuari.

Ai shtoi se pas luftës ka pasur kontakt me disa shqiptarë që jetojnë në qytetin e Gjakovës dhe se banesën e tij ia ka shitur një shqiptari, i cili kishte qenë fqinj i tij.

Ndër të tjera, i akuzuari tha se pas luftës, kur i ka mbushur 65 vjet, ka ardhur në Kosovë, në qytetin e Mitrovicës, për t’u pajisur me letërnjoftimin e Kosovës në mënyrë që të marrë pensionin e pleqërisë.

Po ashtu, ai tha se pas luftës ka shkuar në qytetin e Gjakovës me Policinë dhe me KFOR-in, në varrezat e këtij qyteti, diku ndërmjet viteve 2002–2004, duke shtuar se nuk është i sigurt për vitin e saktë.

Tutje, i akuzuari tha se nuk është në dijeni që dëshmitari Afrim Caka e ka përfshirë emrin e tij në krimet e luftës të ndodhura në Gjakovë.

Ai gjithashtu tha se nuk ka dëgjuar për masakrën në qytetin e Gjakovës.

Paraprakisht, trupi gjykues ka aprovuar provat materiale të propozuara nga mbrojtja më 04.02.2026, të cilat kanë të bëjnë me sigurimin e provave për patentë-shoferin dhe kartelën për letërnjoftim që lidhen me të pandehurin Ristiq.

Trupi gjykues gjithashtu ka refuzuar propozimet e mbrojtjes të paraqitura në seancën e kaluar të shqyrtimit gjyqësor, të cilat kishin të bënin me një person tjetër me emrin Dragolub Ristiq, me arsyetimin se ky person nuk është objekt i kësaj çështjeje penale.

Po ashtu, trupi gjykues ka refuzuar propozimin e mbrojtjes që si provë të administrohet vërtetimi i lëshuar nga MPB-ja e Serbisë, i datës 12.02.2026, me arsyetimin se ky vërtetim është lëshuar nga një shtet tjetër dhe nuk është ndjekur procedura e komunikimit për Bashkëpunim Juridik Ndërkombëtar.

Seanca e radhës për këtë çështje penale pritet të mbahet brenda muajit mars 2026.