Alarm nga “Mjekët pa Kufij”: Uria dhe kequshqyerja në Gaza po arrijnë përmasa katastrofike

Alarm nga “Mjekët pa Kufij”: Uria dhe kequshqyerja në Gaza po arrijnë përmasa katastrofike

Gaza, 11 korrik 2025 – Organizata ndërkombëtare humanitare “Mjekët pa Kufij” ka ngritur alarmin për një përkeqësim të skajshëm të krizës humanitare në Rripin e Gazës, ku luftimet e pandërprera po çojnë në një rritje dramatike të rasteve me kequshqyerje akute, sidomos tek fëmijët dhe gratë.

Sipas raportimeve zyrtare, vetëm në dy qendra shëndetësore – një në qytetin e Gazës dhe tjetra në Al-Mavasi – aktualisht po trajtohen mbi 700 gra shtatzëna dhe nënë gjidhënëse, si dhe afër 500 fëmijë që vuajnë nga kequshqyerja e rëndë ose e moderuar.

Shifrat janë alarmante: në qytetin e Gazës, rastet e kequshqyerjes janë katërfishuar brenda vetëm dy muajsh, duke kaluar nga 293 raste në maj, në 983 raste në fillim të korrikut. Prej tyre, mbi 300 janë foshnja të moshës 6 deri në 23 muaj.

Organizata thekson se kjo situatë kërkon ndërhyrje të menjëhershme dhe ndihmë humanitare të përforcuar, për të parandaluar një katastrofë edhe më të thellë dhe për të shpëtuar jetë në një zonë që ndodhet nën breshërinë e konfliktit të armatosur.