Presidentët e Republikës: Një udhëtim historik nga Rugova e Thaçi, deri te Jahjaga e Osmani

Prishtinë, 25 shkurt 2026 12:02

Kosova, në periudhën e saj të pas-clirimit dhe pavarësisë nga Serbia, është drejtuar nga figura të shquara, dhe jo aq të shquara politike, që kanë ushtruar postin e Presidentit.

Këtë pozitë e kanë mbajtur gjithsej 7 personalitete. Dy nga to ishin gra, e pesë burra. Po ashtu, dy nga ta e mbajtën pozitën për faza shumë të shkurta – vetëm disa muaj (Jakup Krasniqi e Behgjet Pacolli) e pesë tjerët për disa vite – Ibrahim Rugova, Fatmir Sejdiu, Atifete Jahjaga, Hashim Thaçi dhe Vjosa Osmani Sadriu.

Ata kanë lënë gjurmë të ndryshme në proceset e ndërtimit të shtetit, ndërsa secili mandat ka shënuar momente historike të rëndësishme.

Ibrahim Rugova (4 mars 2002 – 21 janar 2006)

Dr. Ibrahim Rugova, i konsideruar, sidomos nga ithtarët e tij nga partia LDK si “Ati i Kombit” dhe figura qendrore e lëvizjes për pavarësi gjatë viteve 90 të shekullit të kaluar, ishte presidenti i parë i Kosovës në periudhën pas-luftës, duke shërbyer nga marsi 2002 deri më 21 janar 2006. U zgjodh në këtë pozitë dhe e la atë, pas vdekjes, gjatë kohës kur vendi ishte nën administrimin ndërkombëtar të OKB-së.

Rugova njihej si politikan që angazhohej në ndërtimin e institucioneve demokratike të Kosovës së pasluftës. Ai krijoi Grupin e Unitetit, që u përball në negociatat për statusin e Kosovës, të udhëhequra nga Marti Ahtisaari, e të cilat përfunduan me propozimin e vitit 2007 për pavarësi të mbikëqyrur. Rugova nuk e pa shpalljen e pavarësisë, sepse vdiq më 21 janar 2006.

Fatmir Sejdiu (10 shkurt 2006 – 27 shtator 2010)

Shuarja e Rugovës ia dha mundësinë Fatmir Sejdiut të pasojë atë në pozitën e presidentit, të cilin e mbajti nga 10 shkurt 2006 deri më 27 shtator 2010. Gjatë mandatit të tij, Kosova shpalli pavarësinë më 17 shkurt 2008, mori shumë njohje ndërkombëtare, forcoi pozicionin e vet si vend i pavarur dhe mori vlerësim nga Gjykata Ndërkombëtare e Drejtësisë më 2010. Ai dha dorëheqje në shtator 2010 pas vendimit të Gjykatës Kushtetuese për papajtueshmëri të funksioneve.

Jakup Krasniqi (27 shtator 2010 – 22 shkurt 2011)

Jakup Krasniqi ushtronte detyrën e presidentit si kryetar i Kuvendit, për rreth 4 muaj, pasi u krijua boshllëk institucional.

Behgjet Pacolli (22 shkurt 2011 – 30 mars 2011)

Behgjet Pacolli u zgjodh president më 22 shkurt 2011, por mandati i tij u shpall i pavlefshëm nga Gjykata Kushtetuese për shkelje procedurale dhe qëndroi në detyrë vetëm pak më shumë se 30 ditë.

Atifete Jahjaga (7 prill 2011 – 7 prill 2016)

Atifete Jahjaga u zgjodh presidente në prill 2011 dhe e mbajti këtë pozitë për një mandat të plotë kushtetues 5-vjeçar. Ajo do të mbahet mend si presidentja e parë grua e Republikës së Kosovës dhe e para që përfundoi mandatin e plotë.

Hashim Thaçi (7 prill 2016 – 5 nëntor 2020)

Hashim Thaçi, i njohur për rolin e tij gjatë luftës së Kosovës dhe si një nga figurat kryesore politike pas vitit 1999, u votua si president më 7 prill 2016. Ai dha dorëheqje më 5 nëntor 2020 pas konfirmimit të aktakuzës nga Dhomat e Specializuara për krime lufte dhe kundër njerëzimit.

Vjosa Osmani (4 prill 2021 – sot)

Pas dorëheqjes së Thaçit, Vjosa Osmani u bë presidente në detyrë dhe më pas u zgjodh presidente me fuqi të plota më 4 prill 2021. Ajo është gruaja e dytë presidente e Kosovës dhe mandati i saj vazhdon aktualisht.

Sipas Kushtetutës, Presidenti i Kosovës është Kreu i Shtetit, përfaqëson vendin ndërkombëtarisht, nënshkruan ligje dhe udhëheq politikën e jashtme, ndërsa zgjedhja është indirekte nga Kuvendi dhe mandati zgjat pesë vjet.