Mitrovica International Jazz Days: Edicioni i katërt sjell emra të njohur botërorë

Mitrovicë, 10 shtator 2026 08:20
Mitrovica po bëhet gati të pres edicionin e katërt të “Mitrovica International Jazz Days”, i cili do të mbahet nga 16 deri më 18 shtator, në Parkun e Qytetit. Për tri ditë, qyteti shndërrohet në qendër të jazz-it, me një program që sjell emra nga skena ndërkombëtare, rajonale dhe vendore.
Mes emrave të kësaj pjese të programit është saksofonisti luksemburgez Maxime Bender, i cili vjen me projektin “Universal Sky”, në krah të Manu Codjia (kitarë), Pol Belardi (tastiera), Stefano Agostini (bas elektrik) dhe Jérôme Klein (bateri). Kuinteti ndërton peizazhe atmosferike dhe groove të thella, duke sjellë një përvojë bashkëkohore të jazz-it, të pasur me energji dhe improvizim.
Më 17 shtator, radhën e merr “Women Bandleaders Night”, natë e kushtuar trios së udhëhequr nga Eleonora Strino, me Giulio Corini (kontrabas) dhe Zeno De Rossi (bateri). Formacioni sjell një ndërthurje të traditës së jazz-it me një qasje bashkëkohore – po ashtu me hyrje falas.