Champions-i rikthehet me katër duele të zjarrta të play-off-it

Prishtinë, 24 shkurt 2026 10:54

Liga e Kampionëve rikthehet sonte me duelet kthyese të fazës “play-off”, të cilat do të përcaktojnë katër skuadrat e fundit që do t’i bashkohen 1/8-ës së finales.

Pas rezultateve të para, gjithçka mbetet e hapur dhe pritet një mbrëmje me ritëm të lartë dhe emocione deri në fund.

Në “San Siro”, Inter kërkon përmbysjen ndaj Bodø/Glimt, pas humbjes 3-1 në Norvegji. Zikaltrit janë të detyruar të sulmojnë që nga minuta e parë, ndërsa mysafirët do të përpiqen të menaxhojnë epërsinë dhe të shfrytëzojnë hapësirat në kundërsulm.

Sfida tjetër zhvillohet në kryeqytetin spanjoll, ku Atletico Madrid përballet me Club Brugge. Barazimi 3-3 nga ndeshja e parë e lë gjithçka të hapur, me madrilenët që mbështeten te përvoja evropiane, ndërsa belgët synojnë të ruajnë qetësinë dhe efikasitetin përpara portës.

Në Gjermani, Bayer Leverkusen pret Olympiacos me avantazhin 2-0 nga takimi i parë. Gjermanët konsiderohen favoritë për kalimin tutje, por grekët kanë treguar shpesh se dinë të reagojnë në ndeshje vendimtare.

Ndërkohë në Angli, Newcastle United është shumë pranë kualifikimit pas fitores 6-1 ndaj Qarabağ FK. “Magpies” pritet të administrojnë rezultatin, ndërsa kampionët e Azerbajxhanit do të kërkojnë një paraqitje dinjitoze në udhëtim.