Prishtina ka nisur vlerësimin e dëmeve nga vërshimet e janarit

Prishtinë, 3 shkurt 2026 17:59

Komuna e Prishtinës ka filluar zyrtarisht vlerësimin e dëmeve të shkaktuara nga vërshimet e muajit janar, të cilat u shkaktuan si pasojë e reshjeve të dendura të shiut dhe rritjes së niveleve të ujërave.

Lajmi u bë i ditur pas një takimi koordinues ndërmjet kryetarit të Prishtinës, Përparim Rama, dhe Komisionit Qendror për Vlerësimin e Dëmeve.

Sipas njoftimit, përmbytjet kanë shkaktuar dëme të konsiderueshme në banesa, biznese, bujqësi dhe infrastrukturë publike, duke prekur si zonat urbane ashtu edhe ato rurale të kryeqytetit.

Procesi i vlerësimit do të zhvillohet në përputhje me procedurat ligjore, me qëllim që dëmet të dokumentohen saktë dhe qytetarët e prekur të përfitojnë mbështetjen e nevojshme.

Nga Komuna e Prishtinës është bërë e ditur se bashkëpunimi me institucionet qendrore do të vazhdojë, ndërsa është premtuar transparencë dhe trajtim i barabartë për të gjitha rastet, në mënyrë që të lehtësohet sa më shpejt rimëkëmbja pas vërshimeve të janarit.