Komuna e Mitrovicës liron hapësirat publike

Mitrovicë, 25 janar 2026 13:43

Komuna e Mitrovicës ka ndërmarrë aksion për lirimin e hapësirave publike, duke larguar shitësit nga trotuaret dhe rrugët dhe duke i vendosur ata në hapësira të dedikuara për shitje dhe siguri ushqimore. Ky aksion është pjesë e angazhimit të vazhdueshëm institucional për vendosjen e rendit dhe rregullit në qytet.

Kryetari i Komunës së Mitrovicës, Faton Peci, ka theksuar se ndërtimi i një qyteti funksional kërkon bashkëpunim të ndërsjellë ndërmjet institucioneve dhe qytetarëve.

“Na duhet një qytet normal, na duhet angazhimi dhe mbështetja edhe e secilit qytetar. Komuna e Mitrovicës është e përkushtuar maksimalisht për rend, rregull dhe ligj”, ka deklaruar Peci.

Sipas tij, edhe gjatë vikendit ka vazhduar bashkëpunimi ndërmjet drejtorive komunale në mirëmbajtjen e përgjithshme të qytetit dhe në ofrimin e shërbimeve për qytetarët. Në kuadër të këtyre aktiviteteve, është larguar një deponi ilegale pranë një kopshti të fëmijëve, e cila për vite me radhë kishte qenë problem i pazgjidhur.

Po ashtu, janë realizuar intervenime në pastrimin e lumit Trepça, ndërsa në zonën e Lisicëve është ndërmarrë aksion për parandalimin e shembjes së rrugës si pasojë e rrëshqitjes së dheut. Në kuadër të lirimit të hapësirave publike, janë rrënuar edhe objekte të ndërtuara në mënyrë të paligjshme.

“Mitrovica do të jetë qytet funksional, i pastër, i gjelbër dhe i sigurt”, ka përfunduar kryetari i Komunës së Mitrovicës.