Arrestohen pesë policë në rastin arrestimit të 27-vjeçarit që vdiq në Lipjan

Prishtinë, 7 Korrik 2025

Pesë zyrtarët policorë, suspendimin e të cilëve e kërkoi Inspektorati Policor, janë arrestuar, pasi dyshohen për veprën “vrasje nga pakujdesia”.

Të njëjtit kanë marrë pjesë në arrestimin e një burri në Lipjan, i cili më pas vdiq.

27-vjeçari, Agon Zejnullahu, ka vdekur në orët e para të së hënës, pak pasi është arrestuar nga policia në Lipjan, për shkak të dyshimeve se po sulmonte automjete e kalimtarë.

E, Alban Zejnullahu, vëllai i të ndjerit ka thënë se Agoni vdiq si pasojë e dhunës së ushtruar nga policia gjatë arrestimit.

“Ne nuk na ka njoftuar kurrgjë, na e kanë ndërruar dy-tri herë, jo kështu ka vdekur, jo kështu. Pasi i kemi parë videot, e kemi vërejtur që rasti ka qenë krejt ndryshe. Nga dhuna e tepruar e policëve, ka ardhur deri te vdekja edhe në bazë të videos siç duket”, ka thënë ai.