39 të arrestuar dhe mbi 1.3 milion euro të sekuestruara në aksionin ndaj Byrosë Kosovare të Sigurimeve

Prizren, 8 janar 2026 18:29

Një aksion i gjerë i Prokurorisë Themelore në Prizren, në bashkëpunim me Policinë e Kosovës – Drejtorinë për Hetimin e Krimeve Ekonomike, ka rezultuar me arrestimin e 39 personave dhe sekuestrimin e mbi 1.3 milion eurosh, gjatë hetimeve për keqpërdorime në Byronë Kosovare të Sigurimeve.

Hetimet disa mujore, të cilat kanë përfshirë masa të veçanta hetimore, zbuluan se të dyshuarit dyshohet se kanë kryer transaksione fiktive, kanë përdorur dokumente të falsifikuara dhe kanë vepruar pa dokumentacion mbështetës, duke shkaktuar dëm material në vlerë prej mbi 1 milion euro.

Gjatë aksionit janë sekuestruar gjithashtu 23.700 euro para të gatshme, ari, aksesorë dhe orë dore, dy armë zjarri, pajisje elektronike, si dhe dokumente dhe kontrata të ndryshme.

Prokuroria ka bërë të ditur se ekziston dyshimi i arsyeshëm për kryerjen e veprave penale “Keqpërdorimi i besimit”, “Keqpërdorimi i autorizimeve ekonomike”, “Falsifikimi i dokumenteve” dhe veprën penale “Keqpërdorimi i besimit” në ndihmë, sipas Kodit Penal të Republikës së Kosovës.

Në hetime kanë qenë të përfshirë gjithsej 47 persona në cilësinë e të pandehurve, përfshirë edhe një person juridik. Të arrestuarit ndodhen nën masën e ndalimit prej 48 orësh, ndërsa Prokuroria do të parashtrojë kërkesë për caktimin e masave për sigurimin e prezencës së tyre në procedurë.

Aksioni u realizua nga tetë prokurorë të shtetit dhe rreth 400 zyrtarë policorë. Prokuroria Themelore në Prizren ka theksuar se mbetet e përkushtuar maksimalisht në luftimin e veprimtarive të kundërligjshme dhe në forcimin e sundimit të ligjit në vend.