Rezultati zgjedhor: LVV 49.39 %, PDK 21.04 %, 13.61 %, AAK 5.69 %

Prishtinë, 29 dhjetor 2025 06:34

Lëvizja Vetëvendosje ka arritur fitore bindëse në zgjedhjet e parakohshme të së dielës. Sipas rezultateve preliminare të Komisionit Qendror të Zgjedhjeve, LVV-ja ka rritjen më të madhe me 49 për qind të votave ose mbi 429 mijë vota, 7 për qind më shumë krahasuar me zgjedhjet e 9 shkurtit, pa i llogaritur votat nga diaspora, votat me kusht dhe ato të personave me nevoja të veçanta. Ky rezultat ia mundëson asaj ta krijojë qeverinë e vetme, me komunitetet joshumicë joserbe. Në vendin e dytë renditet PDK-ja me 21,16 për qind, derisa rënien më të madhe e ka pësuar Lidhja Demokratike duke rënë nën 14 për qind.  

Me një pjesëmarrje prej 44.59 për qind, Lëvizja Vetëvendosje ka dalë forcë e parë me gati 50 për qind të votave të fituara në zgjedhjet e së dielës.  

Sipas rezultateve preliminare të Komisionit Qendror të Zgjedhjeve, LVV-ja shënoi rritjen më të madhe, duke fituar mbi 49 për qind të votave ose mbi 429 mijë vota. Rritje kjo krahasuar me zgjedhjet e 9 shkurtit të këtij viti, kur VV-ja fitoi 396,787 vota apo 42,30 për qind.  

Në vendin e dytë u rendit Partia Demokratike e Kosovës (PDK) me 21,16 për qind ose 178,422 vota, rezultat afërsisht i ngjashëm me atë të shkurtit, apo një rritje prej rreth 1 për qind. Lidhja Demokratike e Kosovës (LDK) shënoi rënien më të madhe krahasuar me zgjedhjet e 9 shkurtit, duke marrë 13,79 për qind të votave (116,224 vota).  

Aleanca për Ardhmërinë e Kosovës (AAK), sipas rezultateve preliminare, ka arritur ta kalojë pragun zgjedhor me 5,74 për qind ose 48,416 vota. Nisma Socialdemokrate nuk arriti të kalojë pragun, duke mbetur nën të me 1,72 për qind të votave.  

Lista Serbe, si partia më e madhe e komunitetit serb, ka deklaruar se ka siguruar të gjitha 10 ulëset e rezervuara për serbët në Kuvend, me rreth 90 për qind të votave nga ky komunitet.  

Nga përllogaritjet sipas formulës “D’Hondt”, LVV-ja ka siguruar 56 ulëse në Kuvend, teksa PDK-ja ka 23, LDK-ja 15, dhe AAK-ja 6 ulëse. Ulëset e tjera ndahen për komunitetet joserbe dhe serbe.  

Vetëvendosje ka fituar edhe në shumicën e komunave të vendit, përfshirë bastionet tradicionale të partive opozitare