Partia “Për liri, drejtësi dhe mbijetesë” nis fushatën me akuza të drejtpërdrejta ndaj Listës Serbe për shantazh dhe presion ndaj qytetarëve

Prishtinë, 19 dhjetor 2025 08:44

Partia “Për liri, drejtësi dhe mbijetesë” ka nisur fushatën parazgjedhore për zgjedhjet e jashtëzakonshme parlamentare në Kosovë, duke e ndërtuar diskursin e saj politik mbi kritika të ashpra ndaj Listës Serbe, të cilën e akuzon për shantazhe sistematike, presion politik dhe krijim të një klime frike në mesin e qytetarëve, veçanërisht në komunitetin serb.

Në njoftimin e saj, kjo parti thekson se synimi i fushatës është që “zëri i qytetarëve të jetë më i fortë se presionet, padrejtësitë dhe frika”, duke vënë në pikëpyetje mundësinë e zhvillimit të një gare të lirë dhe demokratike përballë, siç thuhet, veprimtarisë së Listës Serbe.

Sipas partisë, Lista Serbe ka ndërtuar një mekanizëm kontrolli politik përmes shantazheve, mashtrimeve dhe presioneve të vazhdueshme ndaj qytetarëve, duke ua mohuar atyre lirinë reale të zgjedhjes. Në këtë kontekst, “Për liri, drejtësi dhe mbijetesë” shpreh skepticizëm të hapur se procesi zgjedhor mund të zhvillohet pa ndërhyrje, frikësim dhe ndikim të drejtpërdrejtë politik.

Partia deklaron se fushata e saj do të fokusohet në të drejtat themelore të njeriut, mbrojtjen institucionale të qytetarëve, jetën dinjitoze dhe mbijetesën ekonomike të familjeve në Kosovë, duke e paraqitur veten si alternativë ndaj një politike që, sipas saj, ushqehet me frikë dhe nënshtrim.

“Angazhohemi për drejtësi, zhvillim ekonomik dhe barazi, në një ambient ku qytetarët nuk detyrohen të votojnë nën presion”, thuhet në njoftim, duke shtuar se nevoja për ndryshim është gjithnjë e më e dukshme dhe se qytetarët po e dallojnë gjithnjë e më qartë dallimin mes një politike të lirë dhe një politike të imponuar.

Me mesazhin “liria, drejtësia dhe mbijetesa nuk kanë alternativë”, kjo parti synon të mobilizojë qytetarët që t’u rezistojnë presioneve politike dhe të kundërshtojnë, siç e cilëson ajo, modelin shantazhues dhe autoritar të Listës Serbe.