Elezi: Rezultatet preliminare do të shpallen disa orë pas mbylljes së votimit

Prishtinë, 17 dhjetor 2025 18:19

Zëdhënësi i Komisionit Qendror të Zgjedhjeve (KQZ), Valmir Elezi, ka bërë të ditur se rezultatet preliminare për subjektet politike në zgjedhjet e parakohshme parlamentare të 28 dhjetorit pritet të publikohen brenda disa orësh pas përfundimit të procesit të votimit.

Elezi ka theksuar se pas përfundimit të numërimit të fletëvotimeve në vendvotime, në natën e së dielës do të publikohen rezultatet preliminare për subjektet politike, ndërsa nga dita e hënë do të vazhdojë numërimi i votave për kandidatët për deputetë.

“Besojmë që të dielën në mbrëmje, brenda disa orësh, të kemi rezultatet preliminare për subjektet politike. Në garë janë vetëm 24 subjekte politike, më pak se më 9 shkurt, gjë që e lehtëson procesin e numërimit dhe transmetimit të rezultateve”, ka deklaruar Elezi.

Ai ka shtuar se aktivitetet pas ditës së zgjedhjeve zhvillohen në Qendrat Komunale të Numërimit, ku do të bëhet numërimi i votave për kandidatët për deputetë. Sipas tij, gjatë ditëve të festave mund të ketë pauza në numërim, për çka KQZ do të marrë vendime të veçanta organizative.

“Mund të ketë pauza gjatë ditëve të festave, por të gjitha materialet zgjedhore janë nën përkujdesjen e Policisë së Kosovës”, ka theksuar zëdhënësi i KQZ-së.