Hapet thirrja për transport publik për lidhjen e veriut me Mitrovicën e Jugut

Prishtinë, 17 dhjetor 2025 15:29

Ministri në detyrë i Infrastrukturës, Hysen Durmishi, ka ka njoftuar se ministria ka shpallur të mërkurën hapjen e thirrjes për aplikim për themelimin e transportit publik, me qëllim të përmirësimit të ndërlidhjes së katër komunave veriore me Mitrovicën e Jugut.

Sipas ministrit Durmishi, transporti publik do të subvencionohet nga institucionet, me synimin që të lehtësojë lëvizjen e qytetarëve dhe të forcojë bashkëpunimin ndërmjet veriut dhe jugut të vendit. Ai ka theksuar se ky projekt ka për qëllim të lidhë njerëzit edhe më shumë dhe të kontribuojë në bashkimin funksional të këtyre zonave.

Thirrja për aplikim është e hapur për këto linja të transportit publik:

Mitrovicë e Jugut – Leposaviq – Jarinjë

Mitrovicë e Jugut – Zubin Potok – Bërnjak

Mitrovicë e Jugut – Bërxhanë – Ovazhdë

Mitrovicë e Jugut – Bistricë – Cerajë

Mitrovicë e Jugut – Doljan – Banjskë –Plandishtë – Ballabanë – Soçanicë – Dren – Cernatovë – Bellobërd

Sipas njoftimit zyrtar, janë planifikuar gjithsej gjashtë linja të ndryshme, me nga tre nisje dhe tre kthime brenda ditës, duke synuar ofrimin e një shërbimi të rregullt dhe funksional për qytetarët.

Kompanitë e interesuara për operimin e këtyre linjave kanë afat për aplikim deri më 16 janar 2026.