Osmani: Të hiqen të gjitha masat e Kosova ta marrë statusin e kandidatit

Prishtinë 17 Dhjetor 2025 14:34

Presidentja e Kosovës, Vjosa Osmani është pritur në takim nga presidenti i Këshillit të Bashkimit Evropian, Antonio Costa. Ajo ka thënë se mirëpret vendimin e BE-së për heqjen e pjesshme të masave, përderisa pret që ato të hiqen në tërësi.

“Republika e Kosovës ka dëshmuar konstruktivitet, bashkëpunim e përputhshmëri të plotë me politikën e jashtme e të sigurisë të Bashkimit Evropian”, ka shkruar Osmani.

Presidentja e shtetit thotë se në takim potencoi se Kosova ka përmbushur të gjitha kushtet e përcaktuara nga vetë BE, të cilat Osmani thotë se ishin të padrejta.

“Prandaj nuk ka asnjë arsye që të pengohet e shtyhet heqja e masave të tjera të mbetura. Në anën tjetër, shpresojmë që sa më parë, të kemi përkrahjen e të gjitha shteteve anëtare që edhe Kosova, bazuar në merita, të marrë statusin e kandidatit për anëtarësim në Bashkimin Evropian”, ka shkruar Osmani pas takimit me presidentin e Këshillit të Bashkimit Evropian, Antonio Costa.