Sot përfundojnë afatet për certifikimin e subjekteve politike dhe deklarimin e koalicioneve

Prishtinë, 30 nëntor 2025 10:18

Komisioni Qendror i Zgjedhjeve (KQZ) ka njoftuar se sot, më 30 nëntor, përfundojnë tre afate të rëndësishme zgjedhore për subjektet politike që synojnë të marrin pjesë në zgjedhjet e ardhshme.

Këto afate përfshijnë:

Aplikimin e subjekteve politike për certifikim të pjesëmarrjes në zgjedhje;

Deklarimin e koalicioneve nga partitë politike;

Njoftimin e mospjesëmarrjes në zgjedhje nga partitë politike.

Procesi ka nisur më 24 nëntor dhe do të mbyllet sonte, e diel, 30 nëntor 2025, në orën 23:59. KQZ ka rikujtuar subjektet se afati është i pakalueshëm dhe të gjitha kërkesat e paraqitura pas kësaj ore nuk do të pranohen.

Aplikimi dhe paraqitja e dokumentacionit kryhen online përmes platformës zyrtare të KQZ-së, e cila është vënë në dispozicion për të lehtësuar procedurat dhe për të shmangur vonesat eventuale.

Afatet për certifikim dhe deklarimin e koalicioneve përbëjnë një prej fazave më të rëndësishme të përgatitjes së zgjedhjeve, pasi përcaktojnë qartë subjektet që do të jenë pjesë e garës dhe konfigurimin e mundshëm politik para votimit.