​Tre persona të armatosur kapen në zonë të mbrojtur në Zubin Potok

Zubin Potok 20 Tetor 2025

Policia në Zubin Potok ka arrestuar tre persona të dyshuar për veprat penale armëmbajtje pa leje dhe gjueti e kundërligjshme

Sipas një njoftimi për media bëhet e ditur se më datë 19.10.2025, rreth orës 12:30, zyrtarë nga Pylltaria e Kosovës, gjatë kryerjes së detyrës në fshatin Kërligatë, komuna Zubin Potok, kanë hasur në një automjet në të cilin gjendeshin tre persona të dyshimtë: V.H (1993), F.S(1997). dhe V.S(1990).

“Pas një mosmarrëveshjeje verbale ndërmjet palëve, zyrtarët e pylltarisë (viktimat) janë paraqitur në stacionin policor për të dhënë deklaratën e tyre, ndërsa të dyshuarit janë shoqëruar në SP Zubin Potok, ku vullnetarisht kanë dorëzuar armët si në vijim: 3 pushkë gjuetie, 1 pistoletë, 25 fishekë të armëve përkatëse, 1 radio dore”, thuhet në njoftim.

Po ashtu siç thuhet në njoftim nga hetimet fillestare është konstatuar se në atë zonë nuk lejohet të bëhet gjueti, pasi e njëjta është zonë e mbrojtur.

Me urdhër të prokurorit kompetent, pas intervistimit të dyshuarit janë liruar në procedurë të rregullt, ndërsa ndaj tyre janë inicuar rastet për veprat penale: Mbajtje në pronësi, kontroll ose posedim të paautorizuar të armëve, dhe Gjueti e kundërligjshme.