Zbatimi i Ligjit për të Huajt në Kosovë shtyhet – nga 1 nëntori ndalohet vozitja me autorizim

Prishtinë, 1 tetor 2025

Zbatimi i Ligjit për të huajt në Kosovë, i cili ishte paralajmëruar për sot, 1 tetor, është shtyrë, dhe ende po zhvillohet fushata e informimit të qytetarëve, ndërsa nga 1 nëntori pritet të hyjë në fuqi masa që ndalon vozitjen e automjeteve me autorizim.

Elshani thotë se policia ende nuk ka marrë miratimin nga Ministria e Punëve të Brendshme (MPB) për të filluar zbatimin e “Ligjit për të huajt”.

“Kemi thënë se është në pyetje fushata dhe unë kam qenë për atë që të nisë nga 1 tetori. Ende nuk kemi miratim për të nisur. Aktualisht jemi në fazën e fushatës. Po i informojmë qytetarët se çfarë dhe si duhet vepruar, e më pas kur të marrim miratimin nga MPB-ja, do të fillojmë”, ka deklaruar zëvendësdrejtori i Policisë për rajonin e Veriut, Veton Elshani, pa saktësuar se sa do të zgjasë fushata.

Siç ka sqaruar më herët për mediat, me këtë ligj parashihet që “shtetasit e huaj” që planifikojnë të qëndrojnë në Kosovë më shumë se tre ditë, duhet ta lajmërojnë vendqëndrimin në Ministrinë e Punëve të Brendshme.

Obligimi për deklarim vlen edhe për: studentët, punonjësit shëndetësorë, stafin universitar, çiftet martesore kur njëri bashkëshort nuk është nga Kosova, si dhe për turistët.

Sa i përket personave me dokumente të lëshuara nga strukturat e zhvendosura të policisë serbe, Elshani ka thënë më herët se do të gjendet një zgjidhje për ta.