Marrëveshje bashkëpunimi mes Kosovës dhe Kroacisë në sektorin ushqimor

Prishtinë, 30 shtator 2025

Sot u nënshkrua Marrëveshja e Bashkëpunimit ndërmjet Agjencisë së Ushqimit dhe Veterinarisë së Kosovës dhe Ministrisë së Bujqësisë, Pylltarisë dhe Peshkimit të Republikës së Kroacisë. Marrëveshjen e nënshkruan Drejtori i Agjencisë së Ushqimit dhe Veterinarisë, Bekim Hoxha, dhe Sekretari i Shtetit i Kroacisë, Tugomir Majdak, duke shënuar kështu një hap të rëndësishëm në forcimin e bashkëpunimit bilateral në fushën e sigurisë ushqimore dhe veterinarisë.

Sipas njoftimit të të AUV-it, pas nënshkrimit, Hoxha theksoi rëndësinë e kësaj marrëveshjeje si një hap konkret drejt integrimit të mëtejshëm evropian të Kosovës në fushën e standardeve ushqimore dhe shëndetit veterinar. Ndërsa Sekretari Majdak shprehu gatishmërinë për një bashkëpunim të ngushtë dhe afatgjatë ndërmjet dy vendeve.

“Tugomir Majdak konsiderohet një mik i madh i Kosovës dhe ka dhënë një kontribut të jashtëzakonshëm, veçanërisht duke mbështetur Agjencinë e Ushqimit dhe Veterinarisë në integrimin e saj në organizmat ndërkombëtarë”, thuhet në njoftim.

Marrëveshja do të shërbejë si bazë për zhvillimin e mëtejshëm të politikave dhe iniciativave të përbashkëta, me qëllim përmirësimin e sigurisë ushqimore dhe mbrojtjen e shëndetit të kafshëve në të dy vendet.

“Qëllimet kryesore të kësaj marrëveshjeje përfshijnë vendosjen e bashkëpunimit të drejtpërdrejtë ndërmjet institucioneve përkatëse në fushën e veterinarisë dhe sigurisë ushqimore, realizimin e prioriteteve të përbashkëta përmes shkëmbimit të përvojave, njohurive dhe ekspertizës teknike,, organizimin e vizitave studimore dhe trajnimeve për zyrtarë dhe profesionistë të fushës, bashkëpunimin në fushën e kërkimeve shkencore për përmirësimin e sigurisë së ushqimit dhe shëndetit të kafshëve si dhe angazhimin për të siguruar fonde të përbashkëta dhe individuale për realizimin e projekteve të përbashkëta”, thuhet në njoftim.

Format e bashkëpunimit do të përfshijnë zhvillimin e projekteve në fushën e shëndetit dhe mirëqenies së kafshëve, bashkëpunim teknik ndërmjet laboratorëve veterinarë, shkëmbim informacioni mbi procedurat e importit dhe qasjen në treg, si dhe pjesëmarrje të përbashkët në projekte të financuara nga Bashkimi Evropian, përfshirë IPA-në.

Në takim morën pjesë gjithashtu Irena Georgievski, Udhëheqëse e Politikave Bujqësore, BE-së dhe Bashkëpunimit Ndërkombëtar, si dhe Petra Badovinac, Udhëheqëse për Bashkëpunim Ndërkombëtar.