Aksident me fatalitet në Suharekë, një i vdekur e katër të lënduar

Suharekë 29 Shtator 2025

Një aksident tragjik trafiku ka ndodhur mbrëmjen e së dielës rreth orës 19:50, në rrugën Suharekë–Shtime, mes fshatrave Duhle dhe Carralevë, ku një person ka humbur jetën dhe katër të tjerë janë lënduar, përfshirë drejtuesin e veturës.

Lajmi është konfirmuar nga Policia e Kosovës përmes raportit 24-orësh, ku thuhet se aksidenti ka ndodhur për shkak të humbjes së kontrollit nga ana e drejtuesit të veturës, i cili ka kaluar në shiritin e kundërt dhe është përplasur frontalisht me një autobus që po vinte nga drejtimi tjetër.

“Si pasojë e përplasjes një mashkull kosovar ka ndërruar jetë në vendin e ngjarjes, kurse katër persona të tjerë kanë pësuar lëndime trupore, përfshirë drejtuesin e veturës”, thuhet në raportin e Policisë.

Tre nga të lënduarit janë dërguar për trajtim në Spitalin e Prizrenit, ndërsa drejtuesi i veturës – që ka marrë lëndime të rënda – është transferuar për trajtim të specializuar në Qendrën Klinike Universitare të Kosovës (QKUK) në Prishtinë.

Në vendin e ngjarjes kanë intervenuar njësitet policore për menaxhimin e aksidenteve, si dhe njësia e hetimeve dhe prokurori i rastit.

“Me vendim të prokurorit është urdhëruar ndalimi i të dyshuarit – drejtuesit të veturës”, bëhet e ditur në raport.

Ndërkohë, trupi i pajetë i viktimës është dërguar në Institutin e Mjekësisë Ligjore (IML) për obduksion, në kuadër të procedurave hetimore që janë në vazhdim.