Elshani: Nga 1 nëntori nuk do të lejohet më vozitja me autorizim

Prishtinë, 26 shtator 2025

Ligji për komunikacionin, të cilin Policia e Kosovës pritet ta zbatojë nga 1 nëntori, do të prekë ata pronarë të automjeteve që posedojnë letërnjoftime të lëshuara nga Serbia për qytetarët serbë të Kosovës.

Ky ligj nuk do t’i prekë personat që kanë vendbanim në Serbi, mirëpo ata do të detyrohen të dalin nga Kosova një herë në tre muaj.

Zëvendës komandanti i Policisë së Kosovës për rajonin e Veriut, Veton Elshani, ka folur për Radio Mitrovica e Veriut edhe për fillimin e zbatimit të Ligjit për të huajt në veri të Kosovës, por edhe për Ligjin për komunikacionin, i cili, sipas fushatës që po zhvillohet për të informuar drejtuesit e automjeteve, parasheh që nuk do të jetë më e mundur të vozitet me autorizim, nëse drejtuesi i mjetit nuk ka vendbanim në vendin ku është i regjistruar automjeti që po vozitet me autorizim.

Elshani tha se nuk ka afate të reja për ndërrimin e patentave të shoferit për ata që nuk e kanë bërë këtë në afatin e caktuar.

Ai po ashtu tha se procesi nuk është i ndërlikuar, por ligji do të zbatohet për të gjithë, përfshirë automjetet e kompanive, si dhe ato zyrtare të sektorit të shëndetësisë dhe arsimit, përveç nëse ndërkohë nuk miratohet ndonjë rregullore e re nga Ministria e Punëve të Brendshme e Kosovës.