“The Guardian” në një shtegtim të paharrueshëm në Bjeshkët e Nemuna: “Ah, sikur gurët të kishin zë“

Prishtinë, 04 shtator 2025

Një udhëtim nëpër seksionin e Kosovës të Via Dinarica ofron peizazhe mahnitëse të Ballkanit, histori magjike dhe kujtime të trishta nga e kaluara e afërt e kësaj zone.

Ky është përshkrimi fillestar që Stuart Kenny, gazetar dhe redaktor i pavarur i specializuar në udhëtime, bën në shkrimin e tij të publikuar në të përditshmen e madhe britanike, “The Guardian”, të cilin mund ta gjeni më poshtë, pa ndërhyrje.

Në kodrën në të djathtën time, pak poshtë kreshtës që shënon kufirin Shqipëri–Kosovë, shfaqen bunkerë guri të mbuluar nga mjegulla. Në të majtë, pamja është jo vetëm e qartë, por tronditëse nga bukuria.

Nga aty, mund të shoh poshtë drejt fshatit malor të vogël Gacaferi, ku kisha fjetur mbrëmë, të shoh përtej gjelbërimit të thellë të Grykës së Deçanit, pyjeve me pisha dhe livadheve të mbushura me lule të egra rozë e të verdha, e deri te maja e Çfërles me 2,461 metra lartësi dhe majat e ashpra të Bjeshkëve të Nemuna në perëndim të Kosovës.

Ne ndodhemi në fazën e nëntë të Via Dinarica Kosovë, një shteg prej 120 kilometrash, i ndarë në 13 faza, që përshkon këtë vend plot histori. Itinerari lidhet me Via Dinarica, një shteg ballkanik që shtrihet nga Sllovenia deri në Shqipëri. Seksioni i Kosovës u hap në vitin 2015, por kohët e fundit është rimapuar dhe ri-lansuar si pjesë e një projekti trevjeçar prej rreth 1.4 milionë euro, të financuar nga Agjencia Italiane për Bashkëpunim dhe Zhvillim (AICS).