Mbështetja për ish-krerët e UÇK-së, në fokus të strategjisë shtetërore

Prishtinë, 29 tetor 2026 06:56

Mbështetja e institucioneve të Kosovës për ish-krerët e UÇK-së në procesin e apelit në Hagë dhe mbrojtja e së vërtetës së luftës çlirimtare janë në fokus të Strategjisë Shtetërore që pritet të hartohet nga grupi punues i themeluar për këtë qëllim.

Zëvendëskryeministri i parë dhe ministri i Punëve të Jashtme, Glauk Konjufca, i cili drejton Grupin Punues të Apelit, ka bërë të ditur se strategjia do të përcaktojë drejtimet kryesore të angazhimit shtetëror lidhur me procedurat e apelit para Dhomave të Specializuara në Hagë.

Sipas Konjufcës, kjo nismë mbështetet në Deklaratën e Kuvendit të Kosovës të 28 shtatorit dhe vendimin e Qeverisë të 14 tetorit.

Ai ka theksuar se synimi është që ish-krerët e UÇK-së të kenë mbështetjen e plotë të shtetit gjatë procesit të apelit, ndërsa Kosova të angazhohet edhe në arenën ndërkombëtare për mbrojtjen e asaj që ai e cilëson si të vërtetën e luftës çlirimtare.

Konjufca ka vlerësuar se çështja e UÇK-së tejkalon dallimet politike dhe se institucionet e vendit dhe forcat politike duhet të jenë të bashkuara në këtë proces.

“UÇK-ja na bashkon të gjithëve përtej dallimeve, sepse lufta e saj çlirimtare qëndron në themelet e lirisë dhe të shtetit tonë”, ka deklaruar Konjufca.