Lëndohen 5 persona pas shembjes së një pllake betoni në një objekt ndërtimi në Prizren

Prizren, 28 tetor 2026 14:37

Pesë persona kanë mbetur të lënduar si pasojë e shembjes së një pllake betoni në një objekt ndërtimi në lagjen “Dardania” në Prizren.

Lajmin e ka konfirmuar zëdhënësi i policisë për rajonin e Prizrenit, Shaqir Bytyqi i cili ka bërë të ditur se pas trajtimit mjekësor, të gjithë të lënduarit, me përjashtim të njërit prej tyre janë liruar nga spitali.

Ai ka theksuar se policia dhe ekipet përkatëse kanë dalë në vendin e ngjarjes dhe janë duke mbledhur informacione shtesë për të sqaruar rrethanat dhe shkaqet e këtij incidenti.

“Më 28.10.2026, rreth orës 12:30, Policia ka pranuar informacion nga Emergjenca e Spitalit të Përgjithshëm në Prizren se aty ndodheshin disa persona të lënduar në vendin e punës. Njësitet policore kanë dalë në spital, ku kanë marrë informacion se në një vendpunishte në lagjen Dardania në Prizren ishte shembur një pllakë betoni, si pasojë e së cilës të paktën pesë punëtorë kishin pësuar lëndime të lehta. Sipas informacioneve fillestare, pas trajtimit mjekësor, të gjithë të lënduarit, me përjashtim të njërit, janë liruar nga spitali. Policia dhe ekipet përkatëse kanë dalë në vendin e ngjarjes dhe janë duke mbledhur informacione shtesë për të sqaruar rrethanat dhe shkaqet e këtij incidenti”, thuhet në përgjigjen e tij.