Kryeprokuroria nis shqyrtimin e përgjegjësive institucionale në rastin Zekaj

Prishtinë, 27 tetor 2026 15:58

Kryeprokurori i Shtetit, Zejnulla Gashi, ka marrë vendim që tri lëndë penale që lidhen me rastin e Arlinda Zekaj-Sylajt të ricaktohen nga Prokuroria Themelore në Pejë në Prokurorinë Themelore në Prishtinë.

Vendimi është marrë në bazë të Ligjit për Prokurorin e Shtetit, duke u arsyetuar me rëndësinë e veçantë të çështjeve, pasojat e rënda dhe nevojën për një trajtim efikas, objektiv dhe të paanshëm.

Sipas Zyrës së Kryeprokurorit të Shtetit, paralelisht me ricaktimin e lëndëve po bëhet edhe një analizë e plotë e veprimeve dhe mosveprimeve eventuale institucionale në lidhje me rastet e raportuara nga e ndjera.

Në kuadër të kësaj analize do të shqyrtohen kronologjia e veprimeve, vendimet e marra, vlerësimi i rrezikut dhe masat e ndërmarra për mbrojtjen e saj, si dhe rrethana të tjera që mund të jenë relevante për përcaktimin e përgjegjësive.

Kryeprokurori ka paralajmëruar se, nëse konstatohet shkelje e ligjit, neglizhencë apo mosveprim institucional, do të ndërmerren masa dhe do të kërkohet përgjegjësi për zyrtarët përkatës.

Në komunikatë theksohet se analiza do të bazohet në fakte, dokumentacion dhe prova, pa paragjykuar përgjegjësinë e ndonjë personi.

Zyra e Kryeprokurorit të Shtetit ka përsëritur se mbrojtja e jetës, zbatimi i ligjit dhe llogaridhënia institucionale mbeten detyrime të institucioneve të drejtësisë.