Drita befasoi në fillim, por Copenhagen përmbys ndeshjen në pjesën e dytë

Copenhagen, 22 korrik 2025

Drita dorëzohet në pjesën e dytë ndaj Copenhagenit.

Drita rezistoi vetëm në pjesën e parë, por u mposht 2:0 nga kampioni danez, Copenhagen, në ndeshjen e parë të raundit të dytë kualifikues të Ligës së Kampionëve. Takimi u zhvillua të martën mbrëma në stadiumin “Parken” të Kopenhagës. Pjesa e parë përfundoi pa gola.

Në minutën e 67-të, mbrojtësi Raddy Ovouka shkaktoi penallti, pas një ndërhyrjeje që arbitri e vlerësoi të parregullt. Magnus Mattsson shënoi nga pika e bardhë në minutën e 69-të. Vetëm shtatë minuta më vonë, pas një rishikimi me VAR, u dha penalltia e dytë për vendasit. Sërish Mattsson ishte i saktë, duke shënuar në minutën e 76-të.

Në pjesën e dytë, Copenhageni dominoi lojën dhe krijoi disa raste, por goli erdhi vetëm nga penalltitë.

Ndeshja e kthimit do të luhet të martën e ardhshme në “Fadil Vokrri” nga ora 20:00.

Drita mbetet skuadra e parë kosovare që ka arritur në fazën e dytë kualifikuese të Ligës së Kampionëve. Në rast eliminimi, do të vazhdojë garat në raundin e tretë të Ligës së Evropës.