Natë historike për Kosovën, Botërori një fitore larg

Prishtinë, 26 mars 2026 22:41

Vetëm fitorja ndaj Turqisë të martën e 31 marsit e ndan Kosovën nga kualifikimi historik në Botërorin 2026. “Dardanët” të enjten siguruan kualifikimin për në finalen e plejofit duke mposhtur bindshëm 4:3 Sllovakinë në Bratislavë, vend që nuk e njeh Kosovën shtet.

Sllovakët kaluan dy herë në epërsi në pjesën e parë. E përmbysja e madhe ndodhi në 45 minutat e dytë. Martin Valjent shënoi për epërsinë e parë të vendasve në minutën e 6-të. 15 minuta më pas barazoi gjithçka Veldin Hoxha. Në fund të pjesës së parë, Lukas Haraslin zhgënjeu “Dardanët” me një gol nga gjuajtja e lirë.

Pjesa e dytë shfaqi fytyrë tjetër të Kosovës. Fisnik Asllani qysh në minutën e 47-të me një gol të bukur me kokë tregoi se ekipi i Franco Fodës nuk dorëzohet.

Florent Muslija në minutën e 60-të nga gjuajtja e lirë kaloi Kosovën për herë të parë në epërsi, ndërsa 12 minuta më pas me një goditje të fuqishme Kreshnik Hajrizi “nguliti” topin për 4:2.

Krejt në fund, Sllovakia ngushtoi rezultatin me David Strelecin.

Tani Kosova, më 31 mars e pret Turqinë në finalen e madhe në “Fadil Vokrri”. Fitorja e çon përfaqësuesen e Kosovës në Kampionatin Botëror 2026. Kurrë më herët, Kosova nuk ka qenë në këtë fazë.