​Publikohet lista zyrtare e kategorizimit, gjashtë federata në kategorinë A

Prishtinë 4 Mars 2026 8:10

Ministria e Rinisë dhe Sportit ka publikuar listën përfundimtare të kategorizimit të sporteve në Republikën e Kosovës, ku janë përfshirë 37 federata sportive. Sipas njoftimit zyrtar, 6 federata janë renditur në kategorinë A, një në kategorinë B, katër në kategorinë C, ndërsa 26 federata janë grupuar në kategorinë D.

Në krye të listës në kategorinë A renditet Federata e Xhudos e Kosovës me 115.26 pikë, duke konfirmuar dominimin e saj përmes rezultateve të vazhdueshme ndërkombëtare. Pas saj vjen Federata e Karatesë e Kosovës me 97.5 pikë, e cila mban pozitën e dytë falë paraqitjeve të suksesshme në gara evropiane e botërore.

Pozita e tretë në kategorinë A i takon Federata e Volejbollit të Kosovës me 88 pikë, ndërsa menjëherë pas saj renditet Federata e Hendbollit e Kosovës me 87.8 pikë. Në vendin e pestë është Federata e Futbollit e Kosovës me 85.5 pikë, kurse listën e kategorisë A e mbyll Federata e Basketbollit e Kosovës me 85.3 pikë.
Në kategorinë B është renditur vetëm Federata e Boksit e Kosovës me 83.1 pikë. Ndërkaq, në kategorinë C bëjnë pjesë Federata e Atletikës e Kosovës, Federata e Pingpongut e Kosovës, Federata e Aeronautikës e Kosovës dhe Federata e Sportit Shkollor e Kosovës.

Lexo po ashtu
Sipas listës së publikuar nga ministria, pjesa më e madhe e federatave, gjithsej 26, janë të renditura në kategorinë D, duke reflektuar nivelin aktual të pikëzimit dhe kritereve të përcaktuara nga komisioni profesional për këtë proces të kategorizimit.