Lista Serbe organizon votim kolektiv – I detyron punëtorët arsimor dhe shëndetësor (Video)

Mitrovicë, 28 dhjetor 2025 08:47

Sot në mëngjes nga ora 8:00 në Mitrovicën e Veriut dhe komunat e tjera në veri të Kosovës, u vu re keqpërdorimi i institucioneve publike, nga Lista Serbe që organizoi votim kolekti, duke i shfrytëzuar punëtorët e institucioneve paralele arsimore e shëndetësore serbe.

Punonjësve u është vënë një soj “detyrimi pune”, i cili në praktikë nënkupton shkuarjen kolektive për të votuar për Listën Serbe.

Sipas dëshmive të punonjësve, dita e punës organizohet në mënyrë që grupet e punonjësve të dërgohen te vendvotimet, me udhëzime të qarta se kur dhe ku duhet të votojnë. Pjesëmarrja regjistrohet, ndërsa mungesa nuk tolerohet.

“Kjo nuk është më presion, kjo është urdhër. Njerëzit trajtohen sikur të shkojnë në punë, jo në zgjedhje. Votimi është bërë si një turn në fabrikë,” thotë një qytetare nga pjesa veriore e qytetit për portalin “Veritasinfo”, dukshëm e shqetësuar.

Veçanërisht shqetësuese është fakti që gjithçka ndodh në institucione që duhet të jenë neutrale në aspektin politk. Në vend të kësaj, ato janë shndërruar në një rrjet logjistik të një opsioni politik.

“Nëse paga jote varet nga fakti nëse do të votosh apo jo, atëherë kjo nuk është më zgjedhje. Kjo është shantazh. Por çfarë mund të bësh kur nuk ke ku të ankohesh,” thotë një tjetër qytetar.

Ndërsa Lista Serbe publikisht flet për “bashkim” dhe “mbrojtjen e interesave serbe”, në terren po zbatohet një sistem frike, kontrolli dhe bindjeje. Vendimet për punë janë bërë mjet për disiplinë politike, dhe e drejta e votës bëhet detyrim nën kërcënimin e sanksioneve.

Kjo praktikë jo vetëm që shkel parimet bazë demokratike, por gjithashtu nënçmon qytetarët, duke i shndërruar nga zgjedhës të lirë në statistika dhe “vota të sigurta”. Mitrovica e Veriut sot nuk voton lirshëm; ajo drejtohet për të votuar.