Elezi: Janë shpërndarë mbi 95% e pakove me fletëvotime për votimin me postë të diasporës

Prishtinë, 22 Dhjetor 2025 07:26

Brenda 4 ditësh, Komisioni Qendror i Zgjedhjeve ka arritur të shpërndajë mbi 95% të pakove me fletëvotime për votuesit jashtë Kosovës që janë regjistruar të votojnë përmes postës në zgjedhjet e parakohshme për Kuvendin e Kosovës.

Zëdhënësi i KQZ-së, Valmir Elezi, në një përgjigje me shkrim ka treguar të dhënat e fundit nga ky proces, i cili, sipas tij, është duke u kryer nga KQZ, përmes operatorit ekonomik.

Sipas tij, nga dita martë në mëngjes kur ka filluar shpërndarja e tyre dhe deri premtën në mesnatë, janë shpërndarë 93% e pakove me fletëvotime.

“Nga 16 – 19 dhjetor 2025, nga gjithsej 57,829 dërgesa, 95.37% e tyre apo 55,152, janë dorëzuar me sukses te votuesit. Nga numri i përgjithshëm i dërgesave, 51,420 (95.82%) janë dorëzuar te votuesit në shtete në Europë, ndërkaq, 3,732 dërgesa (89.58%) janë dorëzuar te votuesit në shete jashtë Europës”, njoftoi Elezi.

Elezi ka treguar se këto statistika do të ishin edhe më të larta, nëse votuesit do të ndodheshin në shtëpitë e tyre në kohën kur u janë dërguar pakot me fletëvotime.

“Këto statistika do të ishin edhe më të larta dhe përqindja do të arrinte në 99% nëse do të dorëzoheshin me sukses edhe 1,948 pakot tjera, por kjo s’ka ndodhur gjatë këtyre datave për shkak se votuesit nuk ndodheshin në shtëpi. Sipas kontratës, është detyrë e operatorit ekonomik që dorëzimin e zarfit ta kryejë tek adresa e votuesit dhe mund të pranohet vetëm nga votuesit ose familjarët, të cilët e nënshkruajnë pranimin e dërgesës. Po ashtu, sipas kushteve të kontratës, në adresë të një votuesi, do të shkohet deri në 3 herë për t’ia dorëzuar pakon me fletëvotim”, tha Elezi.

Me qëllim të ofrimit të mundësisë për votim për shtetasit që janë regjistruar për të votuar përmes postës, kutitë postare janë funksionale në këto 23 shtete: Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kosovë, Kroaci, Mali i Zi, Maqedonia e Veriut, Mbretëria e Bashkuar, Norvegji, ShBA, Shqipëri, Slloveni, Suedi, Turqi dhe Zvicër.