Mbi 2 milionë qytetarë me të drejtë vote në zgjedhjet e 28 dhjetorit

Prishtinë, 11 dhjetor 2025 08:15

Zëdhënësi i Komisionit Qendror të Zgjedhjeve (KQZ), Valmir Elezi, ka bërë të ditur se sipas Listës Votuese, në procesin e ardhshëm zgjedhor të drejtë vote do të kenë gjithsej 2,076,290 shtetas të Republikës së Kosovës.

“Sipas të dhënave nga Lista Votuese, numri i qytetarëve me të drejtë vote brenda vendit është 1,999,205, ndërsa 77,085 të tjerë janë regjistruar për të votuar jashtë Kosovës. Kjo listë ka 7,192 votues më shumë krahasuar me zgjedhjet lokale të 12 tetorit 2025”, deklaroi Elezi.

Sipas tij, procesi zgjedhor në territorin e Kosovës do të organizohet në 948 Qendra të Votimit, me gjithsej 2,614 vendvotime. Prej tyre, 910 qendra do të shërbejnë për votimin e rregullt me 2,557 vendvotime, ndërsa 38 qendra, nga një për secilën komunë, do të kenë gjithsej 57 vendvotime të dedikuara për votimin me kusht.