KQZ miraton procedurat emergjente për zgjedhjet, buxheti mbetet pezull

Prishtinë 02 Dhjetor 2025 18:14
Në fillim të mbledhjes së Komisionit Qendror të Zgjedhjeve, pas hapjes së periudhës për regjistrimin e votuesve jashtë Kosovës për zgjedhjet e parakohshme për Kuvendin e Kosovës, KQZ mori vendim për formimin e Komisionit për Kundërshtimin Administrativ.

„Në rast të refuzimit të aplikimit për t’u regjistruar si votues jashtë Kosovës, kundërshtimi ndaj njoftimit të KQZ-së mund të parashtrohet pranë këtij komisioni. Kundërshtimi administrativ mund të dërgohet përmes e-mailit në adresën: [email protected]. Çdo person, të cilit i refuzohet kundërshtimi administrativ, ka të drejtë ankese në Panelin Zgjedhor për Ankesa dhe Parashtresa (PZAP) brenda 48 orëve nga momenti i pranimit të vendimit të KQZ-së për refuzim, theksoi drejtori i Sekretariatit të KQZ-së, Besnik Buzhala.

Në vazhdim të mbledhjes anëtari i PDK-së në KQZ, Ilir Gashi pyeti për çështjen e buxhetit.

“E kam të qartë çështjen e këtij propozimi për shkak të emergjencës dhe zgjedhjeve të jashtëzakonshme, por dua të di se ku qëndron çështja e buxhetit. Ndoshta edhe kryesuesi, si dhe ju si drejtor, mund të na informoni se deri ku ka shkuar procedimi i buxhetit, sepse nuk mund të zhvilloni asnjë operacion zgjedhor pa të”, tha Gashi.

Drejtori i Sekretariatit të KQZ-së, Besnik Buzhala tha se ende nuk ka njoftim nga Ministria e Financave.

“Po, Ilir, siç e dini, më 25 nëntor KQZ-ja ka bërë kërkesën zyrtare përmes arkivës në Ministrinë e Financave dhe ende nuk kemi marrë asnjë njoftim nga kjo ministri. Sapo të marrim përgjigje, mund të fillojmë me aktivitetet tona”, tha Buzhala.
• Në pikën tjetër të rendit të ditës, KQZ miratoi rekomandimin e Sekretariatit të KQZ-së për zhvillimin e procedurave emergjente ekstreme për aktivitetet e prokurimit që lidhen me zgjedhjet e parakohshme për Kuvendin e Kosovës, të cilat do të mbahen më 28 dhjetor 2025.

Këto aktivitete përfshijnë një sërë veprimesh të domosdoshme për organizimin e zgjedhjeve, si:

• shtypja e fletëvotimeve, broshurave dhe listave përfundimtare të votuesve;

• furnizimi me material për votim jashtë Kosovës;

• shërbimet postare për organizimin e votimit jashtë Kosovës (dërgimi i pakove me fletëvotime, materialeve zgjedhore dhe kthimi i tyre);

• pakot e trajnimit për zgjedhjet e parakohshme;

• doracakët e trajnimit;

• plani për informim dhe edukim të votuesve;

• transporti i materialit zgjedhor;

• format zgjedhore;

• kabinat e votimit;

• ngjyrat matrikulare;

• furnizimi me vula;

• materialet administrative për pakot me fletëvotime;

• distinktivët për KKZ, trajnerët, KVV-të, stafin teknik, QNR, SKQZ dhe vëzhguesit e zgjedhjeve;

• lidhëset e sigurisë për kutitë e votimit;

• shërbimi i mirëmbajtjes dhe përkrahjes teknike, eksportimi, ruajtja dhe fshirja e regjistrimeve të vendvotimeve; instalimi, konfigurimi dhe testimi i kamerave në QKN, si dhe furnizimi me pajisje të rrjetit në QKN;

• transporti për stafin e QNR-së dhe të depos;

• furnizimi me sistemin e kamerave dhe kontrollin e qasjeve në QNR; dhe

• furnizimi me materiale për votim jashtë Kosovës.Në kuadër të vazhdimit të përgatitjeve për organizimin e zgjedhjeve të parakohshme për Kuvendin e Kosovës, KQZ mori vendim për miratimin e specifikimeve teknike për shtypjen e fletëvotimeve, broshurave të kandidatëve dhe listave të votuesve. Dokumenti i miratuar është për qëllim të tenderimit të shtypjes së fletëvotimeve, broshurave ë kandidatëve si dhe listave të votuesve për zgjedhjet e parakohshme për Kuvendin e Kosovës. Dizajni dhe numri i saktë i fletëvotimeve që do të shtypen, do të vendoset nga KQZ në një fazë të mëvonshme, pas certifikimit të subjekteve politike, kandidatëve dhe listës së votuesve.