Prishtinë, 2 dhjetor 2025 17:58
Mëngjesin e sotëm në Novi Pazar është arrestuar Gjorgje Radomiroviq, 34-vjeçar, i cili kërkohej nga Interpoli pasi u arratis nga qendra e paraburgimit në veri të Mitrovicës.
Kështu po raporton me burime mediumi serb ‘Blic‘. I dyshuari po vuante heqje lirie për vrasjen e pronarit të një kafeneje në Leposaviq.
Siç raportohet tutje, i dyshuari u arrestua këtë mëngjes për sjellje të dhunshme dhe posedim të ilegal të armëve.
Policia e Kosovës në gusht njoftoi për arratisjen e tij. Shërbimi Korrektues i Kosovës tha se ai ishte i dënuar me 14 vjet e 6 muaj burgim për vrasje – nga të cilat i kishin mbetur edhe 3 vjet e 7 muaj. Për këtë, u pezulluan nga puna katër zyrtarë të shërbimit korrektues.
“Sot janë pezulluar nga puna katër zyrtarë, drejtori i Qendrës së Paraburgimit në Mitrovicë, një mbikëqyrës i lartë dhe dy zyrtarë korrektues për shkak se nga Qendra e Paraburgimit në Mitrovicë është arratisur i burgosuri GJ.R”, tha Shërbimi Korrektues i Kosovës.
I arratisuri kishte qenë duke punuar në hapësirat e punëtorisë së qendrës në paraburgimit në momentin kur kishte ikur.
