Kosova e Zvicra barazojnë në Prishtinë

Prishtinë, 18 nëntor 2025 22:46

Kombëtarja e Kosovës në futboll, e ka mbyllur pozitivisht kampanjën kualifikuese për Kupën e Botës 2026.

Në ndeshjen e fundit, atë të xhiros së gjashtë të Grupit B, Kosova barazoi me Zvicrën, kombëtare këto që përfunduan në dy pozitat e para.

Dueli i luajtur të martën mbrëma në stadiumin “Fadil Vokrri” në Prishtinë, përfundoi me shifrat 1:1.

Me këtë barazim, Zvicra konfirmoi pozitën e parë dhe kualifikimin direkt në Botërorin e vitit të ardhshëm, ndërsa Kosova si e dyta, do të luajë në fazën “play-off”.

Zvicra ka mbyllur ciklin kualifikues me 14 pikë të mbledhura, tri më shumë se Kosova që në gjashtë ndeshje ka pësuar vetëm një humbje, duke regjistruar edhe tri fitore e dy barazime.

Në fakt, Kosova humbjen e vetme e ka nga Zvicra kur në muajin shtator pësoi në udhëtim me rezultatin e thellë 4:0.

Ndeshja e luajtur në Prishtinë, ku tribunat ishin të mbushura, ishte interesante me të dyja kombëtaret që synon ta ndëshkonin njëra tjetrën.

Pjesa e parë, përfundoi 0:0 kurse në të dytën u shënuan të gjitha golat.

Fillimisht, Zvicra zhbllokoi rezultatin nëpërmjet Ruben Vargasit, i cili në minutën e 47-të, shfrytëzoi një huti të mbrojtjes së Kosovës.

Megjithatë, “Dardanët” nuk u dorëzuan dhe arritën të barazojnë rezultatin në minutën e 74-të, me anë të mesfushorit Florent Muslija që realizoi një gol të bukur.

Tani, Kosovës i mbetet që ta mësojë kundërshtarin e parë në fazën “play-off”, ndërsa shorti për këtë do të tërhiqet të enjten në mesditë.