E kërcënoi mësuesen për të votuar Listën Serbe, prokuroria kërkon paraburgimin e një drejtori në Kllokot

Kllokot, 31 tetor 2025

Departamenti për Krime të Rënda në Prokurorinë e Gjilanit ka ndaluar të pandehurin D.K. dhe ndaj tij ka kërkuar masën e paraburgimit, pasi dyshohet se ka kryer veprën penale “Cenimi i përcaktimit të lirë të votuesve”.

Sipas kërkesës, ekziston dyshimi i bazuar se i pandehuri D.K. në cilësinë e drejtorit në një shkollë, gjatë dy muajve të fundit, shtator dhe tetor, ka kërcënuar të dëmtuarën, mësimdhënëse në atë shkollë, se si të votojë dhe e ka detyruar në përcaktimin në votim për subjektin politik ‘’Lista Serbe’’.

Në të kundërtën, viktima u kërcënua se do të përballet me pasoja, si procedura disiplinore, largim nga puna si dhe pasoja tjera socialo-ekonomike, në lidhje me zgjedhjet komunale në Komunën e Kllokotit.

I njëjti me urdhër të prokurorit gjendet nën masën e ndalimit 48 orësh.