Kurti premton ndërtimin e sheshit, QKMF-së dhe çerdheve në Fushë Kosovë: Më 12 tetor votohet për zhvillim dhe barazi

Prishtinë 9 Tetor 2025

Kryetari i Lëvizjes Vetëvendosje, Albin Kurti ka mbajtur tubim elektoral në Fushë Kosovë së bashku me kandidatin për kryetar të kësaj komune nga VV, Valon Prebreza.

Sipas Kurtit, krejt qytetit dhe fshatrat e komunës e kërkojmë ndryshimin e qeverisjes lokale,

“Fushë Kosova frymon VETËVENDOSJE!. Krejt qyteti dhe fshatrat anembanë komunës, e përkrahin, e duan, e kërkojnë ndryshimin e qeverisjes lokale, i cili do vijë pas 12 tetorit, me Valon Prebrezën kryetar. Në Fushë Kosovë ka pasur për vite me radhë ndërtime dhe qeverisje lokale pa plan. Rezultati është një Fushë Kosovë me infrastrukturë të dobët, me mungesë të hapësirave publike dhe me zhvillim të pabarabartë midis qytetit dhe fshatrave”, ka shkruar Kurti në Facebook.

Tutje kryeministri në detyrë premtoi se me qeverisjen e re në Fushë Kosovë do të ndërtohen QKMF të reja, çerdhe të reja, sheshi e banime të përballueshme sociale.

“Me qeverisjen e re, Fushë Kosova do të transformohet në komunë që ndërmerr politika lokale për zhvillim të planifikuar: ndërtim të sheshit të qytetit e hapësirave të gjelbra, ndërtim të QKMF-së të re, çerdheve të reja e banim të përballueshëm e social”, tha Kurti.

“Valoni do t’i zgjidhë problemet e ngrohtores dhe ujit të pijes, si çështje jetike e me ndikim të drejtpërdrejt në përditshmërinë e banorëve. Lëvizja VETËVENDOSJE! nuk e sheh politikën dhe udhëheqjen si privilegj, por si shërbim ndaj shoqërisë e të gjithë qytetarëve pa dallim. E më 12 tetor, në Fushë Kosovë, e votojmë Valon Prebrezën, listën tonë për Kuvend Komunal dhe numrin 105”, tha Kurti.