Policia e Kosovës shkatërron armë ilegale në kuadër të Programit për Siguri – mbi 36 mijë të konfiskuara që nga viti 1999

Prishtinë, 26 shtator 2025

Policia e Kosovës sot ka organizuar ceremoninë e shkatërrimit të armëve të vogla dhe të lehta ilegale, e cila është mbajtur në ambientet e kompanisë Metal 05 SH.P.K., në fshatin Prelez, përgjatë magjistrales Prishtinë–Ferizaj.

Në këtë ngjarje morën pjesë Drejtori i Përgjithshëm i Policisë së Kosovës, kolonel Gazmend Hoxha, përfaqësuesi i përhershëm i UNDP-së në Kosovë, Nuno Queirós, përfaqësues të Zyrës së BE-së, ambasadave të shteteve partnere, si dhe zyrtarë të lartë institucionalë.

Aktiviteti është zhvilluar në kuadër të Programit të Kosovës për Siguri (KSSP), të mbështetur nga UNDP dhe partnerët ndërkombëtarë, si dhe nga projekti rajonal IPA që synon luftimin e posedimit të paligjshëm dhe trafikimit të armëve të vogla në Ballkanin Perëndimor.

Drejtori i Policisë, Gazmend Hoxha, tha se shkatërrimi i armëve ilegale është një proces i vazhdueshëm, në bashkëpunim me vendet partnere dhe miqësore.

“Armët ilegale krijojnë pasiguri. Ne u bëjmë thirrje qytetarëve të qëndrojnë larg armëve ilegale. Të rinjtë duhet të vazhdojnë të besojnë në Policinë e Kosovës. E ardhmja e njerëzve tanë është e sigurtë,” u shpreh Hoxha.

Sipas tij, vetëm që nga viti 1999 e deri më sot, Policia e Kosovës ka konfiskuar mbi 36 mijë armë ilegale.