Williams: Thaçi kishte trysni nga komandantët lokalë, problemi i Demaçit ishte pavarësia

Hagë, 17 shtator 2025

Eksperti amerikan, Paul Williams ka nisur dëshminë në Gjykatën Speciale në rastin kundër krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi e Rexhep Selimi – të cilët akuzohen për krime të pretenduara të luftës.

Williams ka qenë i angazhuar si këshilltar ligjor i delegacionit kosovar në proceset e Rambujesë për statusin përfundimtar të Kosovës. Për këtë, është dekoruar vitin e kaluar nga presidentja Vjosa Osmani me medalje presidenciale të meritave.

Ai ka dëshmuar para Komiteteve të Kongresit të SHBA-së lidhur me drejtësinë dhe llogaridhënien për viktimat e konfliktit në Kosovë, përfshirë për dhunën seksuale gjatë luftës.

Gjithashtu, ka bërë analiza dhe opinione për strategjitë e Kosovës në marrëdhëniet ndërkombëtare, dialogun me Serbinë, si dhe për çështje ligjore që lidhen me komunat me shumicë serbe.

Williams është dëshmitari i dytë i mbrojtjes. Para tij, dëshmoi ish-ndihmësi i sekretarit amerikan të Shtetit, James Rubin.

Paul Williams tregoi në Hagë se për procesin në Rambuje, Hashim Thaçi kishte trysni nga komandantët  e zonave dhe përveç kësaj, Adem Demaçi bënte presion ideologjik.

Sipas dëshmitarit, problemi i Demaçi ishte pavarësia dhe prandaj shkoi Thaçi për të biseduar me atë në Slloveni, raporton “Betimi për Drejtësi“.

Sipas shqiptarëve që ishin në Rambuje, dëshmitari thotë se Thaçi në Slloveni kishte shkuar për të folur me Demaçin. Thotë se kishte pyetur se çka i shërben kjo procesit që po zhvillohej.

“Përgjigja ishte që ishte e domosdoshme për arsye politike dhe kulturore. Ishte e nevojshme që Hashimi të shkonte në Slloveni dhe të vizitonte Demaçin”, tha dëshmitari.

Ai u pyet se çfarë lidhje kishte kjo vizitë me Rambujenë dhe ato se çfarë po ndodhnin atje.

“Gjatë kohës që delegacioni kosovar ishte në Rambuje dhe po kishte progres, kishte trysni nga jashtë nga komandantët lokalë, por gjithashtu kishte presion ideologjik por edhe kulturor prej Adem Demaçit, i cili po pengonte progresin e këtyre negociatave dhe po cenonte lëvizjen për realizimin e kësaj marrëveshje. Prandaj, duhej trajtuar ky aspekt”, tha dëshmitari, duke shtuar se problemi i Adem Demaçi, ishte pavarësia.