Prishtinë, 10 shtator 2025
Prishtinë- Gjykata Themelore në Prishtinë ka caktuar 16 shtatorin 2025 si datë për mbajtjen e seancës fillestare ndaj Jelena Gjukanoviq- zyrtare e misionit të OSBE-së në Kosovë, e cila ngarkohet për spiunazh.
Këtë e ka konfirmuar për “Betimi për Drejtësi“, Melihate Gashi, zëdhënëse e Gjykatës.
“Referuar kërkesës tuaj lidhur me seancën fillestare rreth rastit të J.Gj., nga gjyqtari i çështjes jemi njoftuar se lidhur me rastin, seanca e shqyrtimit fillestarë është caktuar të mbahet me datë 16.09.2025 në orën 09:00”, tha Gashi.
Ndryshe, Prokuroria Speciale e Republikës së Kosovës (PSRK) më 4 shtator 2025 ka ngritur aktakuzë ndaj Gjukanoviqit, e cila ngarkohet se ka ndihmuar me informacione Agjencinë për Inteligjencë dhe Siguri të Republikës së Serbisë.
“J.GJ. akuzohet se nga data e pacaktuar, e deri në momentin e arrestimit më 28.02.2025, në cilësinë e zyrtares të Misionit të OSBE-së në Kosovë, me vetëdije dhe me dashje ka kryer veprime të përsëritura që përbëjnë ndihmë aktive për veprimtarinë informative të një shërbimi të huaj, konkretisht të Agjencisë për Inteligjencë dhe Siguri të Republikës së Serbisë”, thuhej në njoftimin e Prokurorisë.
Gjukanoviq ngarkohet se ka siguruar dhe shpërndarë dokumente dhe informacione të ndjeshme për interes të BIA-s.
Fetoshi: Glorifikimi i Mlladiqit nga Serbia dëshmon vazhdimësinë e politikës së Millosheviqit 
Hoti: Në Serbi kriminelët e luftës vazhdojnë të glorifikohen 
Nënshkruhet “Arsimi 2035+”, nis hartimi i strategjisë së re 10-vjeçare 
Përfundon gërmimi në Kalludër dhe Jabukë, mbetjet mortore dërgohen për ADN në Hagë 
Familjarët e personave të zhdukur vizitojnë lokacionin e varrit masiv në Zubin Potok 
Konjufca shpallet i pafajshëm për hedhjen e gazit lotsjellës në Kuvend