Prokuroria Speciale dhe Policia godasin grupin e dyshuar kriminal, pesë të arrestuar

Prishtinë, 9 qershor 2026 14:32

Pesë persona janë arrestuar në kuadër të operacionit të koduar “White Star”, i cili është zhvilluar të martën në disa rajone të Kosovës, nën drejtimin e Prokurorisë Speciale dhe me zbatim nga Policia e Kosovës. Të dyshuarit po hetohen për përfshirje në krim të organizuar, trafikim të narkotikëve dhe pastrim parash.
Aksioni policor është realizuar në disa lokacione në Prishtinë, Pejë, Prizren, Viti dhe Drenas, bazuar në urdhër të Gjykatës Themelore dhe nën monitorimin e Prokurorisë Speciale. Pas arrestimit, pesë të dyshuarit janë ndaluar për 48 orë me vendim të prokurorit special.

Sipas autoriteteve, të arrestuarit dyshohen për pjesëmarrje ose organizim të grupit kriminal të organizuar, blerje, posedim, shpërndarje dhe shitje të paautorizuar të narkotikëve, si dhe për pastrim parash.

Gjatë kontrolleve të realizuara në kuadër të operacionit, janë sekuestruar prova dhe pasuri të konsiderueshme.

Në mesin e tyre janë gjashtë armë zjarri, pesë karikatorë, 239 fishekë, rreth 9.67 gramë kokainë, mbi 35 gramë fara të marihuanës, 25 telefona mobilë, 10 kompjuterë, 13 pajisje USB, një DVR, 16 ora dore, si dhe 7,595 euro para të gatshme. Po ashtu, autoritetet kanë konfiskuar 10 automjete dhe një motoçikletë.
Operacioni “White Star” është mbështetur nga EUROPOL-i, si dhe nga autoritetet ligjzbatuese të Belgjikës, Francës dhe Holandës. Përfaqësues të këtyre institucioneve, së bashku me prokurorin e rastit, kanë monitoruar nga afër zhvillimin e aksionit.

Prokuroria Speciale dhe Policia e Kosovës kanë theksuar se mbeten të përkushtuara në luftimin e krimit të organizuar dhe forcimin e sundimit të ligjit, duke paralajmëruar vazhdimin e veprimeve të koordinuara për hetimin dhe ndjekjen e veprave penale në vend.