Arrestohet serbi që u premtonte përfitime qytetarëve, në këmbim të votës për Listën Serbe

Prishtinë, 5 qershor 2026 21:24

Kanë mbetur edhe dy ditë deri në mbajtjen e zgjedhjeve të parakohshme parlamentare. Por, të enjten, një person ra në prangat e Policisë së Kosovës, nën dyshimin për ryshfet.

Në Uglarë të Graçanicës, një qytetar i nacionalitet serb ofronte udhëzime si të votohet Lista Serbe të dielën, duke premtuar përfitime të ndryshme. Siç mëson televizioni, i dyshuari është Aleksandër Trajkoviq.

Detaje rreth arrestimit të tij dhanë nga Policia. “Është arrestuar i dyshuari mashkull kosovar, nën dyshimin se ka kryer veprën dhënia ose marrja e ryshfetit në lidhje me votimin. Në lidhje me rastin janë intervistuar dy dëshmitarë meshkuj kosovarë. Është kontrolluar shtëpia e të dyshuarit, ku si prova materiale janë konfiskuar material për votim dhe katër telefona mobil”, thuhet nga Policia e Kosovës.

Gjatë kontrollit të një lokali dhe objekteve të tjera ku ishte lokalizuar vendndodhja e të dyshuarit, janë gjetur një numër i madh i fletëvotimeve të printuara me hijëzim të subjektit politik “Lista Serbe”.

Trajkoviq dyshohet se u premtonte qytetarëve përftime të ndryshme sociale, në këmbim të votës së tyre. “Sipas dyshimeve fillestare, i dyshuari kishte kontaktuar qytetarë nga komunitetit rom, ashkali dhe egjiptian duke u premtuar përfitime të ndryshme sociale në këmbim të votimit sipas udhëzimeve apo kërkesave të tij.

Poashtu, ekzistojnë dyshime se ai u kishte ofruar udhëzime lidhur me mënyrën e plotësimit të fletëvotimeve në ditën e zgjedhjeve”. Me vendim të prokurorit, Aleksandër Trajkoviq është ndaluar për 48 orë.