Aksion i gjerë policor në Mitrovicë dhe Vushtrri, arrestohen 26 persona dhe sekuestrohen rreth 150 mijë euro

Mitrovicë, 19 prill 2026 09:06

Ministri i Punëve të Brendshme, Xhelal Sveçla, ka njoftuar për një aksion të gjerë të Policisë së Kosovës, i zhvilluar mbrëmjen e kaluar në dhjetëra lokacione në Mitrovicë dhe Vushtrri.

Sipas Sveçlës, operacioni kishte për qëllim goditjen e veprimtarive të dyshimta që lidhen me organizimin e skemave piramidale dhe bixhozin e paligjshëm.

Nga ky aksion janë arrestuar gjithsej 26 persona, ndërsa janë sekuestruar rreth 150 mijë euro.

Në një postim në Facebook, Sveçla theksoi se ky operacion është pjesë e angazhimit të institucioneve për luftimin e kriminalitetit në të gjithë territorin e vendit.

“Përveç aksionit anti-drogë në Pejë, mbrëmë u zhvillua edhe një aksion tjetër i madh i Policisë së Kosovës në Mitrovicë dhe Vushtrri, me objekt veprimtari të dyshimta që lidhen me skemat piramidale dhe bixhozin e paligjshëm. Në këtë aksion u arrestuan 26 persona dhe u sekuestruan rreth 150 mijë euro”, ka shkruar ai.

Ai shtoi se institucionet mbeten të përkushtuara për rend dhe ligj, duke theksuar se lufta kundër kriminalitetit do të vazhdojë pa kompromis në çdo pjesë të vendit.