Aksident tragjik në Rubik, 2 të vdekur dhe 5 të plagosur

Prishtinë 17 Prill 2026 18:02

Një aksident i rëndë rrugor është regjistruar pasditen e sotme në Rrugën e Kombit, në segmentin Rrëshen–Milot, në afërsi të Rubikut, duke shkaktuar dy viktima dhe pesë të plagosur.

Sipas informacionit paraprak, në aksident janë përfshirë dy automjete, ku mjeti me drejtues shtetasin N. P., 61 vjeç, është përplasur me automjetin tjetër që drejtohej nga shtetasi D. P., 30 vjeç.

Si pasojë e përplasjes së fortë, kanë humbur jetën drejtuesi i njërit prej automjeteve, shtetasi N. P., si dhe shtetasi F. P., rreth 57 vjeç, i cili ishte babai i drejtuesit tjetër të mjetit.

Ndërkohë, janë plagosur drejtuesi i automjetit tjetër, D. P., si dhe katër pasagjerë që ndodheshin në mjet. Të plagosurit janë transportuar me urgjencë drejt Spitalit të Traumës në Tiranë, ku po marrin ndihmë mjekësore.

Në vendngjarje kanë mbërritur menjëherë shërbimet e policisë dhe grupi hetimor, i cili, nën drejtimin e Prokurorisë, po vijon punën për zbardhjen e plotë të rrethanave dhe përcaktimin e shkakut të aksidentit.