Aksident trafiku në Skenderaj, humb jetën 74 vjeçari

Skenderaj, 17 mars 2026 22:19

Një aksident i rëndë trafiku ka ndodhur sonte pranë xhamisë “Shaban Jashari” në Skenderaj, ku si pasojë ka humbur jetën një këmbësor.

Sipas informacioneve të para nga vendi i ngjarjes, këmbësori është goditur nga një automjet, duke pësuar lëndime të rënda që rezultuan fatale. Në vendin e aksidentit kanë dalë njësitë e Policisë së Kosovës dhe ekipet emergjente, të cilat kanë ndërhyrë menjëherë për të menaxhuar situatën.

Zëdhënësi i Policisë së Kosovës për rajonin e Mitrovicës Avni Zahiti, ka konfirmuar për Veritasinfo ngjarjen dhe ka shtuar se hetuesit policorë janë duke ndërmarrë të gjitha veprimet e duhura për të zbardhur shkaktarët e këtij aksidenti me fatalitet.

“Sonte, rreth orës 21:10, në rrugën “Azem Bejta” në Skenderaj, ka ndodhur një aksident trafiku me pasojë fataliteti.

Në aksident janë përfshirë një veturë dhe një këmbësor. Si pasojë e aksidentit në vendin e ngjarjes ka humbur jetën këmbësori, rreth 74-vjeçar.

Drejtuesi i automjetit është shoqëruar në Stacion Policor për procedura të mëtejme.

Njësitet relevante policore, përfshirë hetuesit e aksidenteve të trafikut, kanë dalë në vendin e ngjarjes dhe janë duke zhvilluar hetime për të sqaruar shkaqet dhe rrethanat e këtij aksidenti”, ka njoftuar Zahiti.