Operacion policor për fajde në Prizren – 700 mijë euro dëm, një i arrestuar e katër në kërkim

Prizren 16 mars 2026 15:43

Policia e Kosovës ka zhvilluar sot një operacion në Prizren, në kuadër të hetimeve për veprën penale të fajdesë.Sipas njoftimit të Policisë, operacioni është realizuar ndaj pesë personave të dyshuar me inicialet B.K., GJ.K., E.K., E.K. dhe E.R.

Të dyshuarit dyshohet se kanë kryer veprat penale “Fajdeja”, “Privimi i kundërligjshëm i lirisë” dhe “Detyrimi”, duke e detyruar viktimën që në mënyrë të vazhdueshme të paguajë shuma të mëdha parash si interes për fajde, përmes presionit dhe dhunës.Sipas dyshimeve, në disa raste viktima është privuar edhe nga liria për ta detyruar të paguajë kamata të larta.

Sipas vlerësimeve fillestare, dëmi ndaj viktimës arrin rreth 700 mijë euro, ndërsa të dyshuarit dyshohet se kanë kërkuar edhe 450 mijë euro shtesë në emër të interesit.Gjatë operacionit janë kryer kontrolle në pesë lokacione në Prizren, ku është arrestuar një person, ndërsa katër të tjerë janë në kërkim policor.

Me vendim të Prokurorisë Themelore në Prizren, personi i arrestuar është ndaluar për 48 orë, ndërsa hetimet për rastin janë duke vazhduar.