Policia konfiskon mbi 5 kg marihuanë dhe një armë zjarri në Vushtrri

Prishtinë 7 Mars 2026 10:22

Policia e Kosovës ka njoftuar se në Vushtrri ka konfiskuar mbi 5 kilogramë substancë të dyshuar narkotike të llojit marihuanë dhe një armë zjarri, ndërsa është arrestuar një person i mitur.

Sipas policisë, rasti ka ndodhur mbrëmjen e 6 marsit, kur hetuesit e Stacionit Policor në Vushtrri, gjatë trajtimit të një rasti të kanosjes dhe mbi bazën e informatave për posedim të narkotikëve, kanë kryer kontroll në një shtëpi në fshatin Sllatinë, me autorizim të prokurorit.

Gjatë kontrollit janë gjetur dhe konfiskuar 5 kilogramë e 61.4 gram substancë e dyshuar marihuanë, si dhe një pistoletë me gjashtë fishekë.

I dyshuari i mitur është arrestuar dhe pas intervistimit, me urdhër të prokurorit të rastit, është liruar në procedurë të rregullt.

Policia ka bërë të ditur se janë iniciuar rastet penale për “blerje, posedim, shpërndarje dhe shitje të paautorizuar të narkotikëve” si dhe për “mbajtje në pronësi, kontroll ose posedim të paautorizuar të armëve”.

Hetimet e mëtejme për rastin po vazhdojnë nga njësia kompetente për hetimin e trafikimit të narkotikëve.